16-17 aqpan kúnderi Mańǵystaý oblysy ákiminiń orynbasary Tilek Jetkizgenuly Iran Islam Respýblıkasynyń astanasy Tegeran qalasynda QR Saýda jáne ıntegrasııa mınıstri Arman Shaqqalıev pen Iran memleketiniń Aýyl sharýashylyǵy mınıstri Ǵolamreza Nýrı Gezeljeniń tóraǵalyǵymen uıymdastyrylǵan bıznes forýmǵa qatysty, dep habarlaıdy Qoǵamdyq kommýnıkasııa ortalyǵy Mańǵystaý oblystyq kásipkerlik jáne saýda basqarmasynyń baspasóz qyzmetine silteme jasap.
Atalǵan bıznes-forýmǵa 50-den astam qazaqstandyq kásipker men 230 ırandyq bıznes ókilderi qatysty. Forýmnyń basty maqsaty - ózara tıimdi yntymaqtastyqtyń áleýetin jáne eki el arasyndaǵy saýda-ekonomıkalyq baılanystardy odan ári damytý boldy.Eki jaqty kezdesý barysynda B2B formatynda, sondaı-aq kelisimge qol qoıý rásimi ótti.
Aıta keteıik, 2024 jyldyń qańtar-qarasha aılarynda Mańǵystaý oblysy men Iran Islam Respýblıkasynyń arasyndaǵy syrtqy saýda -sattyq aınalymy 42,8 mln AQSh dollaryn qurady, onyń ishinde: eksport – 6,1 mln AQSh dollaryn, ımport – 36,7 mln AQSh dollaryn qurady.
Mańǵystaý oblysy men Iran Islam Respýblıkasynyń arasynda syrtqy saýda aınalymyn nyǵaıtý, eksporttyq áleýeti men óńirdiń logıstıkalyq múmkindikterin odan ári damytý maqsatynda Qazaqstan Respýblıkasynyń Saýda jáne ıntegrasııa mınıstri Arman Shaqqalıevtyń qatysýymen ırandyq bıznes ókilderimen kezdesý ótip, birqatar memorandýmdarǵa qol qoıyldy. Memorandýmdar aıasynda óńdeý ónerkásibi, jańa óndiristerdi damytý, aýyl sharýashylyǵy ónimderin óndirý jáne teńiz porttarynyń áleýetin ulǵaıtý baǵyttary qarastyryldy.
Atalǵan kezdesýge, mınıstrmen birge, Qazaqstan Respýblıkasynyń Iran Islam Respýblıkasyndaǵy Elshisi Ońtalap Ońalbaev jáne «QazTrade» saýda saıasatyn damytý ortalyǵy» AQ bas dırektory Aıtmuhamed Aldajarov qatysty.
Sondaı-aq, forým aıasynda Tilek Jetkizgenuly men QR Saýda jáne ıntegrasııa mınıstri Arman Shaqqalıev ırandyq kásiporyndardyń qyzmetimen tanysty.